جيوبي فاضيه

جيوبي فاضيه
.............
الشمس
مش بتدفي حد
والنجمه
لو عاشقه السما
ما كنتش تسقط
و إزاي
أنقط فى الفرح
وجيوبي فاضيه
بيني وما بينها
سنين عطش
ووصل ميه
بتشترك فيه الجيران
مافيش سجاير
فرط فى الدكان
حتي السجاير الصيني
مش عايزاني أموت
شيفاني ليه هلفوت
وأنا إبن الأكرمين
مقدرش حتي أسبلك ب الدين
ولا أقول عليكي
إن إنتي بنت حرام
معقوله نفس الكمسري
ونفس الترام
ونفس المحطات القديمه كلها
ونفس الأغاني
يا حبيبتي إيه أخر الدلع
دأنا شعر سدري إبيض
من كتر الوجع
مع إني كنت زمان
محوش ضحكتين فى الروح
ليه البنات
جوايا دايما ميته
ف أخر القصيده
حتي الليالي منتنه
ومفهاش قمر
هو إحنا إيه
بنا إنكسر؟
وأللاه إحنا إيه
ما بنا باقي
ومنكسرش!!

صورة إيهاب الشاعر
آخر المشاركات: