حلم النهار

حلم النهار

يادي العجب
لما غرق فرعون طلع
موسي وقب
لما حكم موسي طلع
فرعون وقب
وجعل جيوشه اوليا
يطفوا عيون كل الشموس
تصبح شموع فوق المقام
يا ضاربين رمل و ودع
يا شاربين دم الجدع
يا ماسحين كل الاتر
فوق الرصيف دم انتشر
غطي الرصيف
داس الجمل كتف الحمل
دقت طبول
نزلت خيول
نزلت تغوص في دم البشر
داست بياده محمله
فكت صدور متنقرشه
فيها بواقي م الامل
طلعت جنازه محمله فوق الكتاف
جتت البشر
مين المسح كل الاتر
ما ساب اثر
قاضي الغنم لما حكم
نزلت دموع كل السحب
فرشت ميادين التعب
صمت الحروف طرحت لهب
جوة القلوب شئ اندبح
دبلت عيون الشمس الحزينه م الدموع
والحلم دة لسه بعيد
معقول ضمير المحكمة
سعره رخيص
حلم النهار يطلع سراب
دم الشهيد يطلع شراب
كاسات هوا
يعلي ضلام الليل يدوس
فوق النهار
موت الزهور يطلع هزار
محكوم اعيش
مسطول وتايه ف الدروب
من بطن غول لبطن غول
اصحي وانام افتح عيوني ف الضلام
معقول كدة
كل العقول فيها عته
كل العيون فيها عمي
خلص الكلام
كل الحروف تايه تدور علي النقط
فوق اليفط
ولا عادش شئ في الحلم باقي يكتمل
ايه العمل ؟؟؟؟!!!

صورة احمد فخري
آخر المشاركات: