Error message

  • Deprecated function: Methods with the same name as their class will not be constructors in a future version of PHP; views_display has a deprecated constructor in require_once() (line 3157 of /var/www/vhosts/alwarsha.com/httpdocs/includes/bootstrap.inc).
  • Deprecated function: Methods with the same name as their class will not be constructors in a future version of PHP; views_many_to_one_helper has a deprecated constructor in require_once() (line 127 of /var/www/vhosts/alwarsha.com/httpdocs/sites/all/modules/ctools/ctools.module).

وِلْد "ابو سويلم" تِعِب

موت الضَّنَا واعر أوى
جَمْرَاية والْعَة ف قلب أمّ مَتِنْطِفِيشِى وبِيـر وَجَع
لو خَدْتْ مِنُّو أَدْ مَا بْتَاخُد يزِيد
طَبْ إنتى إيه ؟!
مش أُمُّو إنتى وللَّا إيه؟!
أُومّال بأه طول عمرنا بنغنى ونقول أمّنا علشان ف آخر دَرْبِنا تِقْسِى كده ؟!
قِسِيتِى ليه؟!
مين عَلِّمِك تِقْسِى / تِبِيعِى بالْأَوِى ؟!
مين عَلِّمِك تِتْفَرَّجِى والدَّم سَايِل من " محمد "* يِشْتكِى
يِسْتَحْلِفِك تاخديه ف حضنك حَبِّتِين قبل النَّفَسْ مَا يْوَدَّعُو؟
وعْنِيكى رَافْضة تِسْمَعُو
وإيديكى ليه مِتْكَتِّفِين زى الصَّنمْ
قَابِل قَرَابِين المَحَبَّة من قلوب العاشقين
رغم إنُّو مش بإيدو يضر / ينفع أو يِطَيِّبْ وقت ما يزيد الألم ؟
طَبْ ساكتة ليه ؟
اتكلمى
وللَّا الخَرَسْ طَابِق ف زورِك بَعْد ما اتْبَعْتِى حِتَتْ
طَب واقفة ليه ؟
اتْحَرَّكِى
وللَّا العَجَزْ كَتِّفْ خُطَاكِى بَعْد ما ترابك بَهَتْ
وِلْد " ابو سوِيلَم " جَرِيمتو إِنُّو حَبِّكْ
وللَّا يِمْكِن حَبّْ بِنْتِك
مش حَتِفْرِقْ صدقينى
النتيجة ف النهاية : وِلْد "ابو سويلم" تِعِب
النتيجة ف النهاية إنُّو هان
وانْ رِخْصِتْ رُوحُو عَنْدُو
حتَّى حدّ الْإِمْتِهَانْ
وانُّو سَلِّمْ كلّ وَرَقُو بدُون ما يِعْرَفْ إنْ دَا آخر امْتِحَانْ

¬¬¬¬¬¬¬¬¬¬¬¬¬¬________________
" محمد "* : طالب هندسة القاهرة " محمد جمال أبو سويلم " الذى سقط جثة هامدة من الدور الرابع فى المدينة الجامعية بجامعة القاهرة فجر الأربعاء 3/10/2012

صورة سناء مصطفى