Error message

  • Deprecated function: Methods with the same name as their class will not be constructors in a future version of PHP; views_display has a deprecated constructor in require_once() (line 3157 of /var/www/vhosts/alwarsha.com/httpdocs/includes/bootstrap.inc).
  • Deprecated function: Methods with the same name as their class will not be constructors in a future version of PHP; views_many_to_one_helper has a deprecated constructor in require_once() (line 127 of /var/www/vhosts/alwarsha.com/httpdocs/sites/all/modules/ctools/ctools.module).

جناح الريح

السْما...
وَلوْ كانت بْ سبْعة
ما قادّة
تجمع بسْماتْ
مْسافْرة
فْ بْحُور الآتي
تْغدّي جْدورْ صورَة
درْزاتْها احْلامْ
للنّفسْ خْضورة
لبصَرْ فْ كلْ حلمَة
سابحْ
يختارْ لجناحُه فينْ يْطيرْ
يبني عشُّه فوق نْهارْ
هاربْ من ليلْ
لعْقلْ...مْعكَّلْ فْ شْباكْ الحِيرة
يحسبْ خطواتْ النظرْ
فينْ شطْ فرحَة السفرْ ؟
فينْ واقْفة ديكْ السّاعة " س "
الشّامتة لعمرْ ؟

لمَّا اوْراقْ صْفارتْ
بْ اوجاعْ لحملْ
سدّات الجفنْ
اعْيَى لمسافرْ من طريقْ بْلا فْجرْ
شْحالْ من يدْ تغسْلتْ عْلى تْرابُه
أو خلاّته
منفي فْ لهجَرْ
رَجلينْ المَشيَة طابتْ
بْ سْنانْ التَّخمامْ
تْقلّبْ على راسْ طْريقْ
غارقْ فْ السرابْ
من بْعيدْ... لمنارَة غطّاها الضبابْ
الموجْ ... جايْ
يْجدَّفْ
يَدْفعْ فْلوكَََة جَدبانَة
لْ فُم لبْحرْ
كان الظلامْ واسعْ
غطىّ كسْدة السْما
والسَّاعة فْ المجْهولْ غرقتْ
شرْباتْ لخْوا

تْعالي يا سْما
تْعَلآّيْ...
ها شْروقْ الطّينْ
تْلحْفي بْ عْطورُه
خلّي عَينُه تغطسْ فْ طيفكْ
توْرَّدْ الوانْها من لُونكْ
مَلْكِيهْ فْ رْحامَكْ
هو عَلآّكْ فْ وُجودُه آيَة
سمّاكِ... سْماهْ
عيُونه فْ كُونُه
شْربْ من خْلودَكْ ترياقْ
الموتْ فيكْ
عيشة اخْرى
ليها يشتاقْ
يْعرِّي داتُه لْ رْماحْ عيونْ
تجرحْ بياضُه
يْغطّيكْ انتِ
يا معشوقة
بْ كتّان رْجاه
حالمْ بْ وْصالَكْ
يكْملْ مضنونُه
يْهزْ سيفْ إدراكُه
يتْحرّفْ بيهْ
يْحاربْ اطيافْ خانقة الرِّيحْ
راكبْ غْمامْ يْصبْ استفهامْ
عْل صحْرا حاملة بْ شوكْ السَّدرة
مشطونْ بْ خْيالْ وحْدة

من اظفايرْ عشْقُه جَرَّاهْ
طامعْ يْحوزْهَا لْ صبْرُه
يَهبى اجْمرْ الغدّة

الأرضْ...
ولوْ كانتْ بْ سبعَة
ما قادّة تهزْ ظْلامْ
راسبْ فْ حْواضْ الهيفْ
من خروجْ آدم لْ حربْ التّيهْ
غولْ التاريخْ مابْغى يشبعْ
الحصّادة فيه مْحاوْ الأترْ
لمتلّي فْ النّوبة ايْقولْ للسّابقْ
شِي ما شفْتيهْ
يْغلددْ النُّورْ
يَصْرطْ المقهُورْ
يْغمّضْ عْيون الشمسْ
بْ عيْنيهْ
يَغرفْ من الظلمَة
يزرعْ
زرّيعة تشبَه ليهْ

المگانة دارتْ
مْحرْشة سِيفْ الوقتْ
اعْمى ...
يْحُشْ
ويرمِي لْ النّادرْ
المُوري ...گانة ما حطّاتْ عْلى مِينَا
نهارْ قلْنا شفْنا
عادْ تَّعْمينا
نخْصة لغْبينَة
ساكنة اعْظامْ الرُّوحْ
فْ عينْ لعروقْ
عصّرتْ ليّاسْ
طْيورْ الشّوفة
ساكنة فْ كْهوفْ الكَسْدة
تْهيّتْ فْ ترابْ لخريفْ
لْغاها شْناقر فْ الجوفْ
مَحْبوسة...
والسَّاروتْ فْ قلبْ الباطلْ
تالفْ

صورة الميلودي العياشي