صندوق الدنيا




صندوق الدنيا
مسرحية شعرية عامية
محمد حسني


صندوق صندوق مليان حكايـــــــات
جواه دنيــــــــــــا حواديت روايـــات
بنطلع فيها ونحكيها
ونقول اسرارها ومخافيها
ونشوف ابطالها ومين فيها
بالصوت والصوره مع الحركات
صندوق صندوق مليان حكايـــــات
جواه دنيــــــــــــا حواديت روايـات
اسمع حكايتنا وغوص فيها
دقق ف القصة ومعانيها
هاتشوف العبرة وتتعلم
دى حاجات حصلت مافيهاش خرافات
صنـــدوق صنــدوق مليان حكايـــــات
جــــواه دنيــــــــــــا حواديت روايـات
هاتشوف احمس هزم الهكسوس
وعلى الزيبق دا شيطان ملبوس
ملاعيب شيحه راح نلعبها
وتشوف عياق مع بهلونات
صندوق صندوق مليان حكايـــــات
جواه دنيــــــــــــا حواديت روايـات

هند: أيه ياعم شندى قول
ياله غذى ف العقول
واحكى م الحكايات حكاية
تبقى عبرة لدول ودول
أنت فينك من زمان
ليه تغيب قبل الأوان
ياله من تانى البداية
افتح الصندوق وقولى ع اللى كان
مين بنى مصر البهيه
او فدا بروحه العافيه
ابنك أنتي وللنهاية
راح يعزك يا صبيه
للابد مهما يطول
أية يا عم شندى قول

شندى: ليه يا هند تفوقيني
ليه بصوتك بتنادينى
انتو مانسيتوا الحكاوي
حتى صندوقى ناسينى

هند : عمرنا ماننسى ابدا
من كلامك قولنا
شوف حكايه من تاريخنا
فيها بطولات أهلنا


تخرج مجاميع امام شندى فى مساحه كبيره مفتوحه فيها من يرتدى الزى الريفى والفرعونى والعسكرى يمثلوا كل قطاعات الشعب يتقدمو شخوص مختلفه مع الحكى
شندى : ياه صحتونى من هيامى
كنت سارح وف منامى
شوفت خير بطولات كتير
من بداية جدى مينا
شوفت احمس شوفت بيبرس
شوفت ناصر والسادات
مش هانبعد بيكوا خالص
نحكى عن يومنا القريب
من بداية حكم والينا على
شعب كافح الاحتلال
شعب وقت الشدة قال
تهتف المجاميع سعد سعد يحيا سعدويلتفوا حول شخصية تمثل سعد زغلول
كلمته بطول التاريخ
كانت مثال
عنده م الأبطال كتير
من عرابى وسعد باشا
مصطفى كامل وعملوا المستحيل
ولا أبطال الثقافه والعلوم
كنتى يابلدى منارة ف كل يوم
ازهرك كان نجم واحد فى سماء العلم
ومقاومة طغاتك
ياتى فى المساحه الكبيره للعرض اثنين يرتدون الزى الأزهري ويخطبون فى الناس ومعهم رجل دين مسيحى ليظهر أنهم وحده واحده
الشيخ/ لابد من مواجهة الاستعمار بكل الطرق


كان بيفرد نوره للعالم وبيعلم ولادك
كل وقت وكل حين
بس يابلدى دروبك تتحكى روايات سنين
من بداية ابنك انت يافرعونيه كان فصيح
فلاحين ورثوا الصلابه ودمهم راح للوطن
شفتهم فى دنشواى
يخرج من الصفوف شخصين بزى ريفى ويتحدثو إلى الجمهور
فلاح 1 ياجناب القاضى هما اللى جايين يصطادوا وخدو ضربة شمس
فلاح 2 ياجناب القاضى
موتوا رمز السلام والإنسانيه
يعود شندى فى الظهور ويخاطب الحاضرين وهو وسط المجاميع
شفتهم طالعين وبيقابلوا عرابى ف الرجوع
شفتهم وسط المدينه وف النجوع
قوه واحدة تشد فيهم عزمهم
كلمه واحده للوطن بتلمهم
ويقولوا مصر
نفس المجاميع تهتف وكانهم فى مظاهرة
مصر مصر مصر


يظهر على لوحة عرض لخيال الضل صوره لمحمد على و هو
(يمشي مختالا بما يقوم به وما يفعله)
أغنية
ف الصورة باين فللي
باشا كبير عال منطلى
يحلم بمصر تكون كبيرة
الباني فاهم يا علي
واما مسك الحكم قال
قومي يالله وصهللي
راح افرحك مش هاجرحك
وهاخلى ليلك ينجلى
ف الصوره باين فل لالى
مصر الأمل هو الاساس ويا العمل
بين البلاد راح توصلى
ف الصوره باين فل لالى
يظهر محمد على فى وسط مجموعه الشعب ويخطب وكانه واحد من أبناء الشعب ويتحدث الى كل من حوله بلهجه تركية عربية
محمد على: هاعمل حاجات كتيير


وهاخلى البلد كبيير
ليكون منارة الشرق وسوف اقوم بتعليم ابنائه وبناء جيش كبير واعمله حاجات كتير دا شعب يستاهل
يقوله وكانه يتوعد الشعب
يدخل شندى مقاطعا له

شندى : عمل حاجات كتير فى مصر
مدارس وعمل جيش لمصر وعمل نهضة زراعية كبيرة
عمل القناطر الخيريه عشان يساعد على تنمية الزراعة
واهتم بالتعليم وعمل اول جريدة مصرية وسماها جريدة الوقائع
المصريه وانشأ مدرسة الألسن على ايد رفاعة الطهطاوى
وبنى مسجد محمد على وأقام مشروعات لتحسين الري
وفى التجارة اصلح الطرق ووسع ميناء الاسكندريه وانشأ أسطول
تجارى لنقل البضائع المصريه للبلاد وهو مؤسس دواويين الحكومة
عمل كتير وكأنه مصرى أصيل


يظهر محمد على هو وابنه سعيد فى القصر يتبادلان الحديث
محمد على: فلد سعيد أنتي فلد
سعيد : أفت بابا
علي : خد فلد مفتاح بلد وخلي بالك منها أنا تعبت كثير لحد ما
خليتها كدا
سعيد : دونت ووري بابا البلد والناس وكل حاجه جوا عنيا بابي
علي : أنت عارف أنا تنازلت كثير عن أحلامي وطموحي من
شان باب عالي وافق علي تسليم البلد ليك ولأخواتك من
بعدك
سعيد : عارف بابا دى أمانه قلتلك
ويحاول بحركة كوميديا الخلاص منه لتوضيح مطامعه في الحكم

اصح وصلى ع اللى حصل لى
بابا حبيبى
خلانى الوالى وعظم لى
هابقى زعيمكم وهاعلمكم
املا ف جيبى
سمعنى وغنى تراللى
اصح وصلى ع اللى حصل لى
مصر حبيبتى مهما دبلتى
انتى نصيبى
وانا واليكى العثمانلى
اصح وصلى ع اللى حصلى
بابا الوالى بابه العالى
يبقى قريبى
وانا ربيبه وراح يوصل لى
اصح وصلى ع اللى حصل لى
بابا حبيبى
خلانى الوالى وعظم لى


شندى : أول ما صاحبنا مسك البلد
عاش بمزاجه وابتدأ يأمر وينهي في الناس وكأنهم عبيد أو تركة
للمرحوم أبوه
وف يوم من ذات الأيام جه له صاحب الطفولة الفرنساوي
ديلسيبس : ابن قنصل فرنسا ايام محمد علي باشا
(في برواز خيال الضل يظهر سعيد ومعه ديلسيبس )
ديلسبس : سعييييييد مون امى صاخبيى
سعيد : ديلسيبس
فين يا ولد الحلاوة بتاع زمان؟
ديلسبس : موجودة ... موجودة خد حبيبي
سعيد : (يأخذها بتلهف ) برافو حبيبي فاكر لما كنت بتجيبها من ورا بابا
ديلسبس : فاكر فاكر (بجديه) جناب سعيد باشا لقد أثمرت شجرة الصداقة
بيننا فأنا الآن مهندس كبير وقادم إليك بمشروع رائع
سعيد : مهندس ومشروع ماتنساش ( بجديه اشد) أني سعيد باشا والي
مصر
ديلسبس : مش ناسي مولاي وهوده سبب مجيئي لك ألنها رده بالمشروع
جناب باشا.....
شندى : فعلا القناة مشروع كبير ووفر كتير في الوقت وفي تكاليف
السفر علي السفن بين الشرق والغرب غير الإيرادات اللي ها
تدفعها كل سفينه
رايحه جايه
جايه رايحه
الكلام ده اللي اقنع بيه ديلسبس سعيد وكان في نية الخواجه واللي
وراه أن القناة هي مسمار جحا اللي هايدقوه ف مصرويخلي
فرنسا علي طول في قلب مصر
غير انه أغرى صاحبنا الهمام بالمكاسب الكبيرة اللي هاتدخل
جيبه من القناة
وغير المدن الجديدة اللي هاتتعمل
خلاصة الكلام يا سادة يا كرام اقنع سعيد بالحكاية
وعلي فكرة نفس المشروع رفضه محمد علي باشا عشان
أطماع الأجانب ما تزيدش في مصر
وكانت الهبة من سعيد باشا لصاحبه ان مايدفعش أي أجر في
الحفر
وأهل مصر هما اللي يحفروا القناة مش هما برضة أهلها
وبالسخرة والذل أبتدوا يحفروا بالقهر فيها
هيلا هيلا ....... خليها علي الله
أغراب بتتحكم فينا
ودموع ليلاتي ما تكفينا
بالكره والكرباج نمشى
عن أهلنا ليه ينفينا
ومالينا غير لطفك الله
هيلا هيلا .......خليها علي الله

العدل راح منك علي فين
ودموع علي خدودنا صفين
يا قاضي علي عدلك حالفين
يطلع ويحكم لو مرة
هيلا هيلا .......خليها علي الله

أثناء الغناء تعرض صور وثائقيا عن حفر القناة وذلك على اللوحة
الخاصة بخيال
شندى : وبدأت اكبر مأساة في تاريخ مصر الحديث يوم 25/4/1859م
والمأساة مش في حفر
القناة ولكن في ازاي اتحفرت القناة وكم واحد راح ضحيتها
وكلفت كام
أتحفرت ازاي قلنا الناس حفروا بالقهر والكرباج وراح ضحيتها
120الف مصري
وخلي بالكم مصري وخلوا بالكم برضه أن دي مش أول فكرة
لحفر القناة لأنها كانت
ضمن أفكار الحملة الفرنسية على مصر بس كبير المهندسين
للري كتب ساعتها وقال
ان البحر الأحمر يرتفع تسعة أمتار عن البحر الأبيض
وبعد كده يا سامعين بعد الصلاة طبعا ع الزين لجنه من كبار
مهندسي أوروبا سنة 1846م قالوا مفيش خطورة من الفرق ده
وعليها طبعا خد ذيله ف أسنانه وقال يا سعيد
ودارت العجلة
( في شاشة خيال الضل نرى صور للمصريين يحفروا وهم غاية
في التعب)
ش 1 : يا...ه نفسي في شويه مي
ش2 : أنا اللي نفسي ارتاح
ش3 : يا جماعه يا جماعه اعملوا أنكم بتشتغلوا عشان ماننضربش
ش2 : ( يرمى الفأس ) انا مش هاحفر حتى لو هاموت عايز ميه عايز
ارتاح
وتنسحب الصورة والصوت بهدوء
شندى : التاريخ بيقول بنفسه ع المآسي
جلادين ما بيرحموش
شمس حاميه ماترويكوش
شوف توا سخرة وشوف توا موت
انتووا ليه مابتنطقوش
احكوا قولوا تاريخنا ناسى
التاريخ بيقول بنفسه ع المآسى
جلادينك هما هما
يسرقوا منك بهمه
واحنا مش واخدين في بالنا
همنا لقمه وهدمه
همكم ليه ع الكراسي
التاريخ بيقول بنفسه ع المآسي
شندى : وفضل الذل والسخرة عشر سنين
مات فيها ناس وإتولدت ناس
راح سعيد باشا وجالنا إسماعيل برضه باشا
وابتدى ويا إسماعيل احتلال مصر اقتصاديا
يعنى قصوره وحفلاته ودفعه تعويضات لأهالي الناس اللي مات
ماتوا في القناة وغرق هو والبلد في الديون
وياريت كان دفع هو التعويضات بنفسه إنما
ادا للشركة عشان هي اللي تدفع التعويضات نيابة عن الحكومة
وطبعا الشركة مادفعتش لحد حاجة
وهو ده الحكم اللي حكم به ملك فرنسا بين إسماعيل والشركة
وقول زيادة للبلة طين دفع كثير للباب العالي عشان يا خد لقب
خديوي ويبقى أول خديوي لمصر وافرحي يا بلد
أغنية
باشوات يا بلدنا الباشاوات
بيع فيها وهات دول باشوات
علشان زعلان من دى الكلمة
باع فيها بسرعة وبهمة
ودفع ألوفات مش من جيبه
علي عيبه ياعلم ما نسيبه
دي بلدنا بتدفع سلامات
باشوات يابلدنا الباشوات
قوم غير باشا لخديوي
وبلدنا فلاح وبديوي
ضربوا له سلام مش أي كلام
شوف بقي يا سلام بلد الحركات
باشوات يا بلدنا باشوات
شندى : وجه معاد الافتتاح واتبنت بلاد ما كنتش مبنية
وا تعمل استراحات من مصر ولحد القناة

واتعملت الاوبرا واتمدت الأفراح واليالي الملاح والكهارب والزينه
لجل ما ضيوفك يابلدي تكون في راحه
واستلفنا عشان ما نعمل دي الحكاية
حتى ناس خواجات ساعتها يا خلق قالت أن بريطانيا وفرنسا ما
يقدر وش لو فكروا علي دي الفخامة للخديوي
هات سلف عشان ما نصرف كل حاجه يا ناس نبيعها
بعنا حصتنا في قناتنا
بعد موت أهالينا والزل لأولادنا
والقناة جوه بلدنا
بس مش بتاعتنا خالص( بطريقة الدراويش)
دوله من جواها دوله وكله خالص
كله خالص يا بلدنا وشوف ياحي

اغنية

غريب على أرضي يابلدنا ماترضـــي
وعـلينــا ياعـنينـــــا م الدمع ليه تفضي
الحال كده بطال
وابن البلد بطال
وخواجه عال العال
يطلب يبات مرضي
غريب علي أرضي يا بلدنا ما ترضي
يا مصري من حصري
ابكي عليك نصري
شيدت لك قصري
ع الهم قوم واقضي
غريب علي أرضي يا بلدنا ما ترضي

شندى : بقينا فعلا ضيوف علي البلد وضيوفنا بقوا أصحاب البلد والكلمة
وعملوا مراقبين علي الحكومة ومحاكم مخصوصة ليهم
واحنا ما لناش فيها حاجة ولاحتي بقي لينا كرامة
في بلدنا روحنا وراحت علينا غنينا بالسلامة
( في الخلفية موسيقي لا غنية سالمة يا سلامه
وعلي شاشة العرض صور للمظاهرات الوطنيه وتظهر صورة أحمد عرابي )

شندى : ولما قامت المظاهرات أحمد عرابي ومعاه الشعب استنجد الخديوي بالانجليز اللي زي مايكون صدقوا وكانت قناة السويس هي باب الدخول للقوات وده رغم وعد ديلسبس لعرابي ان القناة ممر للسفن المدنية ولن يسمح بمرور سفن عسكرية حتى لو سفن فرنسية
.....
يعنى ايه ياناس يعني اية ياخلق
القناة اللي ماتوا فيها جدودنا واستلفنا علشانها وفلستنا
هي تبقي سبب البلاوي واتحكم فينا الانجليز واستعبدونا
يدخلوا حرب ندخل معاهم واحنا مالناش فيها حاجة ونموت عشانهم
شفتوا لحد دلوقت وفي العلميين اثارهم والغامهم تحكي وتقول
ايه ياناسنا ...
ماتفوقوا اصحوا
(علي شاشة العرض تعرض مقاطع من الحرب العالميه وسفوط الشهداء مع موسيقي قوم يامصري )

شندى : بس الحكاية اللي ابتدت وانتهت وهي حزينة
مااستمرتش على طول وانتهت نهاية علي الفرنسيين زي مابيقول المثل بخيبة آمل
وده حصل ياسادة ياكرام لما حكم مصر ابن من ابناء المصريين
(على شاشة العرض صوره لجمال عبد الناصر )
اصر انه ياخد حق المصريين وياخد بتار اللي ماتوا في القناة وتبقي القناة مصرية زي مااتحفرت بايد مصرية

كفاية حكم الغرب فينا
اغانى منوعه من اغانى الثورة
(صوت الزعيم في خطاب التأميم الشهير)

مش بس القناة رجعت لنا مصر كلها رجعت لولادها
ورجعت مصر منارة للعالم وللشعوب المحتله رمز للقدرة على التخلص من الظلم والاستعباد ورمز للثورة في كل بلد محتل
وشجعت ثورات كتير في بلاد كتيرة
على التحدي والجسارة والنهوض بالبلاد

شندى : كان من الضرروري ان الدول الكبري ترد علي مصر وكان
انذار انجليزي فرنساوي بان مصر ترجع القناة في الحال لان القناة
نقطة ملاحة دوليه ورفضت مصر ان ادارة القناة تكون دوليه لان القناة
مصرية واتحفرت بايدين مصرية وانتظرت الدول الكبري ان
المصريين مايعرفوش يشغلوا القناة وانهم قال ايه هايلوصو

ويغرقوا ومايلقوش اللي يدلهم
بس المصري عنيد عرف يشتغل ويتدري باسرع وقت
مابقاش قدام الدول الكبرى غير تحالف الشيطان فرنسا وانجلتر والشيطان التالت اسرائيل علي اساس يرعبوا المصريين في الشوارع ودفعهم لكره عبد الناصر ورجال الثورة ولكن الشعب تمسك بعبد الناصر ورجاله وقرروا الصمود امامهم وكانت كلمة مصر علي لسان ابنها جمال ومن فوق منبر الازهر الشريف
(سنقاتل ... سنقاتل...)

هند: بعدها ياعم شندى ايه حصل
شندى : يا....ه
حصل كتير بس ابن مصر اللى فحت القناة
كان لازم يطلع من صلبه اللى يحافظ ويدافع عن مصر بدمه
زى ماجدودهم عملوا وجه يوم النصر العظيم فى اكتوبر
بس دى حكاية كبيره عايزه ليلة لوحدها
فيها كل ولاد بلدنا ضحوا علشان ارضها
كلنا ف الجبهة واحد مصرنا ونموت لها


صورة محمد حسنى

التعليقات (1)

العزيز محمد حسني
بعد شكري لك على استضافتك لي والأخت العزيزة زينات القليوبي والشعراء أشرف الشافعي وحسام حسين وغيرهم بواحتك الفيومية الجميلة اسمح لي أن أحسدك على هذه الجرأة والولوج إلى عالم المسرح الشعري إلا أن النص يحتاج إلى الكثير من القراءة لا يتسع لها المقام هنا كل ما يمكنني قوله أن المقاطع السردية (النثرية) تحتاج منك نظرة ثانية إذ أن بعضها ينحو نحو المباشرة وكنت أفضل أن تكون حتى تلك المقاطع نثراً فنياً حتى لا تنتقص من النص الشعري المنساب
العزيز
أحييك وأشد على يديك
أسامة فرحات
صورة أسامة فرحات