الغالي

الغالي
--------
كإنه لسه فيه الروح بيتشهد بيتنهد
تفر الدمعة من عينه وتحرقني
يقول :اقعد هنا قبالي ومتخفش
أنا ماشي ومش راجع
*****************

هروح ازرع بلاد تانيه
وهتصبر على الفرقه على الغرب’ على الأحباب بقولة آه
كإن الجمرة ف إيديا بتلسعني
ومش عارف أطفيها
كإني شايف العتمة بتندهلي
أنام بدري ومتأخرش
كإني طالع السلم وانا طاير ،وشايف سكه طوالي وتكعيبة عنب أحمر
علي يميني
وشابه حلوه بصالي ف خص البوص
يا واد اجمد ومتعيطش
أنا مروح ومش زعلان
غيطاني لسه محروته هتزرعها
وأمك ساقيه مبروكه هترويها وتحرسها
أقولك يلا إمشي وقوم
ومدمعش تكسرني
أقولك سيبني وحديا
وقوم خدم على الجايين
وقدم قهوه على روحي
وإوعى تنسى تقرالي وتدعيلي
وإملا المندره البحري بكل غلابة الجييه
ووكلهم وشبعهم
وإكبر يلا واسترجل
وإكتب بكره علي صابحه
وعيش الدنيا من بابها
كإني شايف العيل على التوته بيتنطط
وينزل يمشي يتكعبل ف طرف التوب
يا واد اجمد ومتعيطش
يا واد اجمد ومتعيطش
----------------------
نهى رجب محمد
ريشة المطر
17/10/2010
أرحب بكل كلمة حق

صورة نهى رجب